O Concello de Oroso abre hoxe o prazo de inscrición nun curso de automasaxe.
O Concello ten programados outros dous cursos, de primeiros auxilios e de coidado persoal, que terán lugar nos meses de maio e xuño.
O Concello de Oroso abríu hoxe mércores o prazo de inscrición para un curso de automasaxe, que se celebrará o vindeiro mes de abril. Trátase dun curso de 6 horas de duración na que un máximo de 18 alumnos aprenderán a realizar unha masaxe terapéutica coas súas propias mans en diversas partes do corpo para mellora-lo seu estado de saúde.
Os alumnos coñecerán as distintas técnicas de masaxe e os puntos a masaxear para conseguiren determinados efectos beneficiosos para a súa saúde. Así, coñecerán que masaxeando a frente poden aliviar as dores de cabeza e a relaxar a mente, mentras que masaxear os glúteos prevén o lumbago e a ciática.
O curso celebrarase os catro xoves do mes de abril, en horario de 20:30 a 22:00 horas, no Centro Cultural Fernando Casas e Novoa. Terá un custe de 10 euros para empadroados no Concello de Oroso e de 20 euros para non empadroados. O prazo de inscrición abríuse hoxe mércores, 27 de febreiro, e pecharase o 17 de marzo.
Primeiros auxilios e coidado persoal
Asimesmo, o Concello de Oroso ten programados outros dous cursos para os meses de maio e xuño. O primeiro deles, de 40 horas de duración, será sobre primeiros auxilios, no que os 20 asistentes poderán obter un certificado de asistencia. O curso terá lugar no Centro Cultural Fernando Casas e Novoa os sábados 10, 24 e 31 de maio, e o 7 e 12 de xuño, en horario de 10:00 a 14:00 horas e de 16:00 a 20:00 horas.
O curso terá un custe de inscrición de 90 euros para empadroados e de 135 euros para non empadroados. O prazo de inscrición neste curso organizado pola Cruz Vermella española abrirase do 1 ao 23 de abril.
Finalmente, o Concello de Oroso realizará un curso de coidado persoal, que terá lugar todos os sábados do mes de xuño, en horario de 19:00 a 21:00 horas, no Centro Cultura Fernando Casas e Novoa de Sigüeiro. Ofértanse un total de 15 prazas, e o prazo de inscrición estará aberto do 2 ao 23 de maio. O prezo de inscrición é de 25 euros para empadroados e de 40 euros para non empadroados.