O pavillón de Sigüeiro acolle este venres a final da Liga de Fútbol Sala do Concello de Oroso.
No campionato participaron un total de 170 veciños de Oroso divididos en catorce conxuntos.
O pavillón municipal de Sigüeiro acollerá este venres, 6 de xuño, a final da Liga de Fútbol Sala do Concello de Oroso, que se veu disputando dende o pasado mes de xaneiro. Un campionato no que participaron un total de 170 veciños de Oroso, divididos en catorce equipos.
Despois da xornada regular e do correspondente play-off, a final deste venres será disputada polos conxuntos do Barciela e do Cafetería Lembranzas. Dous equipos que venceron con certa comodidade nas súas respectivas semifinais, onde o Barciela venceu por 4-1 ao Coufe Sigüeiro mentres o Cafetería Lembranzas endosáballe un contundente 6-0 ao Spirit Oroso. Ademais, este partido ofrece o aliciente de ver fronte a fronte ao máximo goleador do campionato, Fernando Rey (Barciela), e ao porteiro menos goleado, Daniel Vázquez (Cafetería Lembranzas).
A gran final terá lugar ás 21:30 horas deste venres, 6 de xuño, no pavillón municipal de Sigüeiro. Un partido que estará presidido polo alcalde de Oroso, Manuel Mirás, e polo concelleiro de Deportes, Eduardo Veiras, que farán entrega dos trofeos correspondentes ao campión e ao finalista do torneo.
Entrega de premios
Así mesmo, o Concello de Oroso fará entrega doutros tres galardóns especiais. O primeiro deles será ao equipo máis deportivo do torneo, que recaeu no Rafra Softsigüeiro. Os outros dous premios son para premiar aos dous deportistas máis destacados da liga: Daniel Vázquez, do equipo Cafetería Lembranzas como mellor porteiro, e Fernando Rey, do Barciela, como máximo goleador da liga.
O concelleiro de Deportes, Eduardo Veiras, amosouse moi satisfeito pola alta participación rexistrada este ano, xa que “cumpriuse co obxectivo desta actividade, que era ofrecer a todos os veciños de Oroso a posibilidade de practicar deporte e promover, ao mesmo tempo, as boas relacións entre todos”.