O Concello de Oroso enviará información por e-mail sobre ofertas de traballo e cursos de formación a todos os veciños que o soliciten.
Os interesados en recibir este servizo deberán cubrir unha autorización no Servizo de Emprego orosán.
O Concello de Oroso vén de poñer en marcha unha iniciativa para facilitar o acceso dos veciños e veciñas do municipio a toda a información sobre ofertas de emprego, cursos e oposicións. Un servizo posto en marcha de xeito experimental dende mediados de febreiro e que, debido ao seu éxito, agora o Concello de Oroso quere abrir a toda a poboación do municipio.
Así, dúas veces por semana o Servizo de Emprego de Oroso enviará por e-mail información sobre ofertas de traballo, obradoiros, cursos formativos e oposicións a todos os veciños e veciñas que o soliciten expresamente. A información enviarase, inicialmente, todos os martes e xoves, aínda que tamén se poderán mandar mails noutras datas en casos puntuais pola importancia da convocatoria.
Ata o de agora, o Servizo de Emprego prestaba este servizo a través dun taboleiro de anuncios colocado no departamento de Servizos Sociais do Concello de Oroso. Unha práctica que se manterá e á que se engade este envío de información por e-mail.
Iniciativa de balde
Participar nesta iniciativa é totalmente de balde, pero os veciños e veciñas deberán acudir ao Servizo de Emprego de Oroso, situado na rúa do Deporte (Sigüeiro) para encher unha autorización expresa para poder enviarlles a información ao seu e-mail. De feito, dende o Servizo de Emprego mesmo se ofrecen para crearlles contas de mail a aqueles veciños que non dispoñan delas. Ademais, carecer dun ordenador ou de conexión a Internet tampouco será un obstáculo, xa que as consultas se poderán facer sen problemas dende a aula de informática orosá, no centro cultural de Sigüeiro.
Durante 2009, o Servizo de Emprego do Concello de Oroso atendeu a un total de 460 persoas. Unha cifra á que hai que sumar os setenta veciños e veciñas atendidos no que vai de 2010. O horario de atención ao público do Servizo de Emprego é mércores, xoves e venres, de 9:30 a 13:30 horas.
