Oroso estrea na biblioteca unha sala intelixente que funcionará as 24 horas dos 365 días do ano
Os usuarios só teñen que solicitar na biblioteca un código persoal que lles
permitirá acceder a través dun sistema de apertura automatizado
A sala conta con 26 postos de estudo e conexión wifi, ademais dun sistema de
videovixilancia para garantir a correcta utilización das instalacións
O alcalde de Oroso, Luis Rey, e varios
compañeiros/as do goberno local acudiron na noite de onte á estrea da nova “sala
intelixente” da biblioteca municipal de Sigüeiro, que xa comezou a funcionar cun
horario permanente: as 24 horas do día, os 365 días do ano.
Esta “sala intelixente” conta cun sistema de apertura automatizada que permite
acceder ao seu interior a calquera hora do día e da noite cun código numérico
individual que toda persoa interesada pode solicitar na biblioteca de forma gratuíta.
Ademais de acondicionar o exterior destas novas dependencias e de instalar o
sistema de acceso automatizado, o concello dotou a esta “sala intelixente” do
mobiliario necesario para habilitar 26 postos de estudo, ademais de conexión wifi e
un sistema de videovixilancia para garantir a correcta utilización das instalacións.
O alcalde, Luis Rey, que onte acompañou aos primeiros usuarios na estrea das
instalacións, explicou que trátase “dunha iniciativa pioneira dirixida principalmente
aos estudantes e aos opositores e que se implanta en Oroso a proposta dun grupo de
mozos”. “Divulgade a existencia deste novo servizo entre os vosos compañeiros e
amigos, utilizádeo para estudar e, sobre todo, coidádeo”, pediulle aos mozos e
mozas presentes.
