IV Certame de traballos de investigación do Camiño Inglés
Bases do Certame
O Concello de Oroso convoca o IV Certame de Traballos de Investigación do Camiño Inglés, de acordo coas seguintes
- Os traballos deberán referirse a calquera faceta do Camiño Inglés, (histórica, lingüistica, xeográfica, botánica, ecolóxica...) tanto en Galicia como noutras partes de España ou outros países.
- Poderán ser presentados en galego normativo, castelán ou inglés e deberán ser orixinais e inéditos. Aceptaranse os que foran presentados a outros certames sempre e cando non recibiran premio nin mención algunha, nin foran posteriormente publicados en calquera tipo de soporte.
- Establécense tres categorías: investigadores/as, peregrinos/as maiores de idade (diarios de peregrino e experiencias persoais) e mozos/as ata os 18 anos.
- A extensión mínima será de 18.000 caracteres para investigadores/as, 5.000 para peregrinos/as e 2.500 para os/as menores de 18 anos, e deberán presentarse en Word e PDF agás os estudantes de Primaria e Infantil, que poderán presentalos escritos a man. Admítense fotos, debuxos e infografías citando a súa procedencia. O autor ou autores responsabilizanse de que non estean suxeitos a dereitos de autor.
- Nas categorías de investigadores/as e peregrinos/as os traballos deberán presentar a maiores unha copia en papel, no Centro Cultural Fernando de Casas e Novoa. O Word e máis o PDF deberán remitirse aos seguintes enderezos: cutlrua@oroso.gal e bibloteca@oroso.gal. Deberán constar os datos personais (nome e apelidos, data de nacemento, enderezo, DNI e teléfono de contacto)
- Poderán ser presentados por persoas individuais ou por conxuntos de persoas. Cada autor/a ou autores/as poderán presentar cantos traballos desexen.
- As persoas que resultan premiadas recibirán un diploma acreditativo da súa participación no certame.
- Os premios estarán suxeitos ás retencións que marque a Lei. A estancia, así como o bono, terán validez durante un ano dende a data do fallo do xurado.
- Establécense os seguintes premios:
Investigadores/as:
Primeiro premio: 1.000 euros
Segundo premio: 500 euros
Terceiro premio: unha tableta.
Peregrinos/as:
Primeiro premio: 500 euros
Segundo premio: unha tableta
Terceiro premio: Invitación para dúas persoas para coñecer unha fin de semana (sábado e domingo) o Concello de Oroso con gastos pagos.
Mozos/as ata 18 anos:
Primeiro premio: Unha tableta
Segundo premio: unha cámara estilo go pro
Terceiro premio: un bono para mercar nunha tenda do Concello de Oroso por valor de 50 euros
- A data límite de presentación dos orixinais será o 13 de abril de 2019 ás 14 horas.
- O Concello de Oroso designará un xurado para cada categoría (que poderá ser o mesmo para as tres), que estará composto por un mínimo de cinco persoas, das cales polo menos tres deberán ser alleas a corporación municipal e ao cadro de persoal administrativo do Concello de Oroso, presididas polo concelleiro de Camiño Inglés ou persoa na que este delegue. No xurado de investigadores/as, polo menos un dos seus membros pertencerá ao claustro dalgunha universidade galega. Os xurados faranse públicos ao mesmo tempo que os seus fallos.
- Calquera premio pode ser declarado deserto.
- O Concello quedará cunha copia dos traballos presentados, que pasará a formar parte dos fondos propios do CEICI (Centro de Estudos e Investigación do Camiño Inglés). Así mesmo, o/a autor/a ou autores/as cederán ao dito Concello, polo mero feito de presentarse, os dereitos de publicación da primeira edición dos traballos premiados.
- Non se devolverán os orixinais nin as copias dos traballos participantes.
- A participación neste certame implica a aceptación destas bases e das resolucións que tomen os xurados en caso de calquera discrepancia ou aclaración.
