Oroso divulgará a música tradicional con media ducia de actuacións no “Fiadeiro de Outono 2022”
O Centro Cultural e a Alameda de Góis acollerán os
días 27, 28 e 29 de outubro a celebración do “Fiadeiro de Outono 2022”, organizado
por catro colectivos veciñais de Oroso en colaboración co Concello e no que se
divulgará a música tradicional galega a través de obradoiros, media ducia de
actuacións musicais e un magosto popular.
As actividades darán comezo o xoves 27 de outubro coa presentación do libro “A gaita
na terra de Melide”, do escritor Suso Escariz, ás 19.30 horas no Centro Cultural. A
segunda actividade, o venres 28 ás 17.00 horas, terá lugar no Centro Cultural e
consistirá nun obradoiro no que os/as asistentes poderán aprender a construír un
pandeiro. Esta actividade terá un prezo de 65 euros por persoa e aqueles/as que
desexen participar deberán inscribirse ata o mércores 26 no teléfono 665 880 200.
Xa o sábado 29 a Alameda de Góis será o escenario do Festival Folclórico e do magosto
popular, actos cos que culminará o “Fiadeiro de Outono 2022” e que incluirán senllos
obradoiros e actuacións de balde. A xornada comezará ás 16.00 horas co obradoiro de
baile tradicional, que será impartido pola Asociación Folklórica Buxos Verdes; ás 16.45
horas a Asociación Folklórica Lembranzas do Tambre coordinará un obradoiro de
pandeireta; e ás 17.30 horas será a quenda do obradoiro de percusión, a cargo da
Asociación Cultural Argalleiros.
Xa a partir das 18.30 horas darán comezo as actuacións musicais das catro asociacións
organizadoras do evento: A.F. Buxos Verdes; A.F. Lembranzas do Tambre; A.C.
Argalleiros e Néboas no Cumio.
O peche de “Fiadeiro de Outono 2022” chegará ás 20.30 horas coa celebración dun
magosto popular con degustación gratuíta de castañas, acompañado das actuacións
das agrupacións de música tradicional 3 Pesos e Carapaus.
