Saúda de Nadal - Luis Rey Villaverde, alcalde de Oroso
Estimados veciños e veciñas de Oroso:
Estamos xa a poucos días de rematar outro ano que sen dúbida non esqueceremos con facilidade, un 2021 que estivo moi marcado aínda polo coronavirus. Ogallá 2022 sexa o ano no que conseguimos deixar atrás a pandemia de forma definitiva.
Quero por suposto ter en primeiro lugar unha lembranza moi especial para todas aquelas persoas que desgrazadamente faleceron durante 2021, enviando unha agarimosa aperta a todos os seus familiares e achegados.
Moito ánimo e saúde tamén para os veciños e veciñas de Oroso que teñen neste momento algunha outra enfermidade, co desexo dunha moi pronta recuperación.
Como calquera pode ver, o virus déixanos claro que a pandemia aínda non rematou. Toca seguir coidándonos e coidar aos demais. Estou convencido de que a luz ao final do túnel está cada vez máis preto. Moito ánimo.
Desde que tomei posesión no pasado mes de maio, son moitas as persoas que me preguntan polos proxectos que teño en mente para Oroso. Os teño, por suposto, pero ninguén debe esquecer que o principal obxectivo a curto e medio prazo debe xer deixar atrás esta pandemia do coronavirus.
Nestes seis meses xa tiven contacto con moitos de vos, pero nas próximas semanas continuarei a falar con todos os colectivos e agrupacións veciñais, culturais, sociais, empresariais ou deportivas, visitando todas as parroquias para coñecer as vosas demandas e inquedanzas.
Quero aproveitar estas liñas para darvos as grazas de antemán pola vosa axuda e engadir que, como non podía ser doutra maneira, tedes abertas as portas do concello para trasladarme todas aquelas cousas que vos preocupan ou interesan.
Chega agora, como comentei anteriormente, o tempo do Nadal e desde o Concello queremos que sexan unhas festas especiais. Son unhas datas máxicas para os nenos e nenas e debémoslles un esforzo, tiveron un comportamento exemplar e merecen un Bo Nadal.
Desexo que no ano 2022 sexamos todos capaces de superar os retos aos que nos enfrentamos. Estou convencido de que así será, coa confianza de que dentro dun ano teña a oportunidade de volver a dirixirme a vós nunha mellor situación.
Moitas grazas a todos e a todas. Bo Nadal e próspero Aninovo. Felicidade e saúde!
LUIS REY VILLAVERDE, ALCALDE DE OROSO